Rev 1 | WSK | STEP | Den imi yumura te aniram, bare Jesus Kristus wetang te beteram. Mel udagi aratukko ko tom pingi awaram wore Kristus ko ura kariimet nunga kausokko se ko Kaem Kristus kausam. Se Kristus mel imi ani noko ura kari John aga kausokko, se ko engel beteram se agate tairam ale aga kausam.

Revelation of John 1

Den gira

1 Den imi yumura te aniram, bare Jesus Kristus wetang te beteram. Mel udagi aratukko ko tom pingi awaram wore Kristus ko ura kariimet nunga kausokko se ko Kaem Kristus kausam. Se Kristus mel imi ani noko ura kari John aga kausokko, se ko engel beteram se agate tairam ale aga kausam. 2 Se ani mel suen biya arigem mu batoga imi te balu saperem, ale iwita ko balsam, mu Kaem ko den, se Jesus Kristus ko den umutang ani balem.

3 Se awiriya mel udagi te aratukko mu ko den imi kaurok ale ikiok, mu amilmilurukko. Se kariimet den imi ko kutek mamon ale ikimon ale karo tumon, mu amilmilomonko tala. Mu awuk, mel aratukko Kaem balam mu ko tom pingi aram.

4 Ani John, ani tam gawa bataguru nina Kris kariimet motam 7 Asia sor te bagasan mu ningarsam. ^{▼▼Rev 1:4 Number 7 mu number suen la ningi Kaem ko balso. Se mel 7 ko balsan mu eng diram, se ura suen la mu te nama dirma saposo.} Kaem, se ko Korang Bur, se Jesus Kristus, nunga nongomang yawara, se nunga lila ningarmon se te bagaralko. Kaem girakala bagakaso, aitak bagoso, ale udagi te bagurukko. Ko Korang Bur 7 mu noko koma dugu te anisan. 5 Se Jesus Kristus Nuet ko dugu duap diram la balu saposo. Nu kari kuera nunga ningi nu giram barasam. Ale nu ali imi ko king suen la nunga bitaru saposo.

Nu ana ninguru nanga kueso,
ale ko gue te ana talipara ningi wore nanga gi wetang te nanga awuram.
6 Nu ko kingdom ningi nanga awuram,
ale noko Kaem, noko Nuet, mu ko priest ura betenakko nanga awuram. ^{▼▼Rev 1:6 Jesus mu King se Priest tala. Se ana nu ilak kapetaman bagasan mu nu iwitatala bagasan: Exo 19:4-6; 1 Peter 2:9; Rev 5:10.}
Se ana noko nup tom suen biya patawu se laganakko.
Nu sokel karogo, nikitang karogo, pempem la, nunguning!

7 Arigalko, nu taiti nuwi karogo tairukkowo!
Nu tairuk se kariimet singir la nu aringimonko,
se kariimet nu moman mu ago la aringimonko. ^{▼▼Rev 1:7 Zechariah 12:10. Kager kari bo gatu te Jesus beta te atumu barukuam: John 19:34,37.}
Mu ali imi ko kariimet lilim la nu ko mamon niamonko.
Se mu butata aratukko! Nunguning.

8 Kari Biya Kaem, Sokel Karogo, nu iwita balso, “Ani agata Alpha se Omega,” maso. ^{▼▼Rev 1:8 Alpha masan mu Greek den te nunga alphabet ningi letter gira aniso wore. Se Omega mu nunga alphabet ningi letter nukum te aniso wore.} Mu Kaem borta girakala bagakaso, ale aitak bagoso, ale udagi te bagurukko.

John Kristus arigam

9 Ani nenenga launuria bo John. Ani nengerak wete Kaem ko kingdom ningi baga se, Jesus ko nup ko ikup yaman gi lagasan. Bare nu nanga sangarso se ana sokel ago bagasan. Ani Kaem ko den apukasam, ale Jesus Kristus ko dugu duap balukasam, umutang ko aninga karoman ale Patmos tual gotek mu te aga beteman se bagerem. ^{▼▼Rev 1:9 Patmos tual mu garagarayam, sor suen la manga la. Rome supuling alo talipara kari sang tual umutang te nunga awukasan se bagakasan.} 10 Se Kari Biya ko tom biya mu te, ani Korang Bur sokel ago aga iram se bagerem, se abiring ko kuring bo biugel itugusan iwita aratam se ikiem. 11 Mu iwita balam, “Mel ni arik mu suen la batoga bo patunga ^{▼▼Rev 1:11 Tam gawa garek karogo, tam karogo isi guruga betera.} te bataguru ale, wonong 7 imitang, Ephesus, se Smyrna, se Pergamum, se Thyatira, se Sardis, se Philadelphia, se Laodicea, umutang ko Kris alo nongote bitar se namurukko.”

12 Se ani kari munakakaso wore arigekko punga geragem, mu aking galep 7 gold te nungurman mu arigem, 13 ale nunga kusumuri kari bo kari nunguning iwita mu sanamiwaram se arigem. ^{▼▼Rev 1:13 Prophet Daniel mu “kari bo kari nunguning iwita” wore ko balam, umutang nu Messiah Jesus ko balukaso: Dan 7:13-14.} Nu guang naguram mu maiya la nama kapa suwik kopa te, se guang bilik maiya la gold ago biguwura ale nunga mu kokosa te aniram. 14 Se ko mone mu siraram nunguningkiri, sipsip mone iwita, se taiti nuwi siraram iwitatala. Se ko motam mu tama kuamili iwita. 15 Ko sowek tuagu ko nikim mu brass tama te kaisan se yu aso ale ko nikim diriyam aringiyam aratoso mu iwitata. Se ko dogotak kuring ko nirung mu yu garap luan te tai suragoso ale nirung kapawoso iwitata.

16 Nu baras 7 kuting sengam mu te iluwam, se batir, koma singsang kore wuli kapawara, mu ko kuring te aratam. ^{▼▼Rev 1:16 Kaem ko den mu batir iwita: Heb 4:12; Rev 2:12,16; 19:15,21.} Se ko koma motam ko nikim mu worem tai dirmaso ale ko nikim biyala kaposo iwitata.

17 Se ani nu arigem mu ani kuerem suwik duap ningi dagulem, ale kua ko iwita bagakasam. Bare nu ko kuting sengam mu angimik te beteram, ale aga maonam, “Me nguangerko! Ani agata Duap se Nukum,” mam. 18 “Ani marak bagasam! Ani kuerem, bare agarkiko, ani aitak tom suen biya ko marak bagasam! Ani kuera ko sokel menawurem, ale kariimet kuera nunga nuguwim ^{▼▼Rev 1:18 Greek den te kuwim imi ko nup Hades.} ko songkuring te kaoga ko bugu mu ani iluwasam. 19 Buta se mel ni arigem, aitakta aratuwoso se udagi aratukko, mu suen la tam gawa te bataguruko. Baras 7 agiting te iluwasam se arigem, se galep gold 7 mu ko nunguning mu iwita: baras 7 mu Kris alo motam 7 nunga engel alo ^{▼▼Rev 1:20 Kris kagin motam 7 mu suwan suwan nunga bitua kari bo karogo, umutang engel masan.}, se galep 7 mu Kris alo motam 7.

20